Manchester United hefur lengi verið í hópi bestu knattspyrnuliða heims og árangur þess á síðustu árum er með hreinum ólíkindum. Frá árinu 1992, þegar enska úrvalsdeildin (Premier League) var stofnuð, hefur liðið 12 sinnum orðið Englandsmeistari og aðeins þrisvar lent neðar en í 3. sæti. Liðið hefur hampað enska meistaratitlinum alls 20 sinnum, oftar en nokkuð annað lið.

Á afrekaskrá Manchester United ber líklega hæst keppnistímabilið 1998 - 1999 þegar liðið vann þrjá titla, leikmenn þess urðu Englandsmeistarar, bikarmeistarar og unnu Evrópukeppni meistaraliða eftir magnaðan úrslitaleik við Bayern München.

Eftir keppnistímabilið 2012 - 2013 lét Sir Alex Ferguson af störfum sem knattspyrnustjóri Manchester United eftir langan og ótrúlega sigursælan feril. Undir stjórn Sir Alex vann félagið alls 38 titla, þar af þrettán Englandsmeistaratitla auk þess sem liðið varð í tvígang Evrópumeistari.

David Moyes tók við stjórn Manchester United af Sir Alex en hann var rekinn úr starfi í apríl 2014 og Ryan Giggs stjórnaði liðinu til loka keppnistímabilsins. Þann 19. maí 2014 tók Louis van Gaal við sem knattspyrnustjóri Manchester United og Ryan Giggs var ráðinn aðstoðarmaður hans.

Talsverðar breytingar urðu á leikmannahópi Manchester United fyrir keppnistímabilið 2015 - 2016 og þess ber helst að geta að frá liðinu fóru þeir Anders Lindegaard (frjáls för til West Bromwich Albion), Javier Hernandez (seldur til Bayer Leverkusen), Adnan Januzaj (lánaður til Borussia Dortmund - kom til baka í janúar), Jonny Evans (seldur til West Bromwich Albion), Radamel Falcao (skilað aftur til Monaco), Nani (seldur til Fenerbahce), Ángelo Henríquez (seldur til Dinamo Zagreb), Tom Cleverley (leystur undan samningi, fór til Everton), Rafael Da Silva (seldur til Lyon), Ángel Di María (seldur til Paris Saint-Germain) og síðast en ekki síst, Robin van Persie (seldur til Fenerbakce).

Til liðsins komu þeir Anthony Martial (keyptur frá Monaco), Sergio Romero (frjáls för frá Sampdoria), Memphis Depay (keyptur frá PSV Eindhoven), Matteo Darmian (keyptur frá Torino), Morgan Schneiderlin (keyptur frá Southampton) og Bastian Schweinsteiger (keyptur frá Bayern München).

24. maí 2016 var Louis van Gaal sagt upp störfum enda árangur liðsins, undir hans stjórn, langt undir væntingum. 27. maí 2016 var José Mourinho ráðinn knattspyrnustjóri Manchester United og 2. júlí 2016 tilkynnti Ryan Giggs að hann væri farinn frá Manchester United, eftir að hafa verið hjá liðinu síðan 1987.

Helstu breytingar á leikmannahópi Manchester Untited, fyrir keppnistímabilið 2016 - 2017, voru þær að frá liðinu fóru þeir Victor Valdes (frjáls för til Middlesbrough), Adnan Januzaj (lánaður til Sunderland), Guillermo Varela (lánaður til Eintracht Frankfurt), Cameron Borthwick-Jackson (lánaður til Wolves), James Wilson (lánaður til Derby County) og Paddy McNair (seldur til Sunderland).

Til liðsins komu þeir Zlatan Ibrahimović (frjáls för frá Paris Saint-Germain), Eric Bailly (keyptur frá Villarreal), Henrikh Mkhitaryan (keyptur frá Borussia Dortmund) og Paul Pogba (keyptur frá Juventus).

Í janúar 2017 urðu þær breytingar á leikmannahópi Manchester United að frá liðinu fóru þeir Sam Johnstone (lánaður til Aston Villa), Morgan Schneiderlin (seldur til Everton) og Memphis Depay (seldur til Olympique Lyonnais).

Þann 29. mars 2017 var Bastian Schweinsteiger seldur til Chicago Fire í Bandaríkjunum.

Þær breytingar urðu helstar á leikmannahópi Manchester United, fyrir keppnistímabilið 2017 - 2018, að frá liðinu fóru Andreas Pereira (lánaður til Valencia), Timothy Fosu-Mensah (lánaður til Crystal Palace), Cameron Borthwick-Jackson (lánaður til Leeds), Zlatan Ibrahimović (leystur undan samningi), Adnan Januzaj (seldur til Real Sociedad) og Wayne Rooney (seldur til Everton).

Til liðsins komu Victor Lindelof (keyptur frá Benfica), Romelu Lukaku (keyptur frá Everton) og Nemanja Matić (keyptur frá Chelsea).

Þann 24. ágúst 2017 var samningur Manchester United við Zlatan Ibrahimović endurnýjaður en þann 22. mars 2018 fór Zlatan frá Manchester United til LA Galaxy í Bandaríkjunum.

Þann 22. janúar 2018 urðu leikmannaskipti á milli Manchester United og Arsenal þegar Alexis Sánchez kom til Manchester United og Henrikh Mkhitaryan fór til Arsenal.

Það urðu ekki miklar breytingar á liði Manchester United fyrir keppnistímabilið 2018 - 2019. Frá liðinu fóru m.a. Michael Carrick (lagði skóna á hilluna), Daley Blind (seldur til Ajax) og Sam Johnstone (seldur til West Bromwich Albion).

Til liðsins komu Frederico Rodrigues de Paula Santos, þekktur sem Fred, (keyptur frá Shakhtar Donetsk), Diogo Dalot (keyptur frá Porto) og Lee Grant (keyptur frá Stoke City).

Þann 18. desember 2018 var Jose Mourinho vikið úr starfi sem knattspyrnustjóri og daginn eftir var tilkynnt að goðsögn Manchester United, Ole Gunnar Solskjær, myndi stjórna liðinu út keppnistímabilið 2018 - 2019. Þann 20. mars 2019, þegar Mancester United hafði unnið 14 af 19 leikjum undir stjórn Ole Gunnar, var hann ráðinn sem knattspyrnustjóri til næstu þriggja ára.

Helstu breytingar sem urðu á liði Manchester United fyrir keppnistímabilið 2019 - 2020 voru þær að frá liðinu fóru Ander Herrera (seldur til Paris Saint-Germain), Antonio Valencia (frjáls för til LDU Quito), Romelu Lukaku (seldur til Inter Milan), Alexis Sánchez (lánaður til Inter Milan), Chris Smalling (lánaður til AS Roma) og Matteo Darmian (seldur til Parma).

Til liðsins komu Daniel James (keyptur frá Swansea City), Aaron Wan-Bissaka (keyptur frá Crystal Palace) og Harry Maguire (keyptur frá Leicester City).

Í janúar 2020 urðu þær breytingar helstar á liði Manchester United að frá liðinu fóru Ashley Young (seldur til Inter Milan) og Marcos Roco (lánaður til Estudiantes). Til liðsins komu Bruno Fernandes (keyptur frá Sporting Clube de Portugal), Nathan Bishop (keyptur frá Southend United) og Odion Ighalo (fenginn að láni frá Shanghai Greenland Shenhua).

Mánudagskvöldið 5. október 2020, þegar lokað var fyrir leikmannakaup á milli landa, höfðu þær breytingar helstar orðið á liði Manchester United, frá janúar 2020, að frá liðinu fóru þeir Diogo Dalot (lánaður til AC Milan), Alexis Sánchez (seldur til Inter Milan), Chris Smalling (seldur til AS Roma), Joel Pereira (lánaður til Huddersfield) og Tahith Chong (lánaður til Werder Bremen).

Til liðsins komu Donny van de Beek (keyptur frá Ajax), Alex Telles (keyptur frá Porto), Amad Diallo (keyptur frá Atalanta), Edinson Cavani (samningslaus eftir að hafa verið hjá Paris Saint-Germain) og Facundo Pellistri (keyptur frá Club Atlético Peñarol).

Þegar lokað var fyrir félagaskipti leikmanna, að kvöldi 31. ágúst 2021, höfðu nokkrar breytingar orðið á liði Manchester United frá lokum keppnistímabilsins 2020 - 2021. Frá liðinu voru m.a. farnir Sergio Germán Romero (leystur undan samningi), Joel Castro Pereira (leystur undan samningi og fór til RKC Waaljwik), Tahith Chong (lánaður til Birmingham City), Axel Tuanzebe (lánaður til Aston Villa), Brandon Williams (lánaður til Norwich City) og Daniel James (seldur til Wolverhampton Wanderers).

Til liðsins komu Jesse Lindgaard (var í láni hjá West Ham United), Diogo Dalot (var í láni hjá AC Milan), Tom Heaton (frjáls för frá Aston Villa), Jadon Sancho (keyptur frá Borussia Dortmund), Raphaël Xavier Varane (keyptur frá Real Madrid) og - síðast en ekki síst - Cristiano Ronaldo (keyptur frá Juventus).

Þann 21. nóvember 2021 lét Ole Gunnar Solskjær af störfum sem knattspyrnustjóri Manchester United, eftir afleitt gengi liðsins í nokkurn tíma. Liðið hafði þá m.a. tapað 5:0 fyrir Liverpool, 2:0 fyrir Manchester City, 4:1 fyrir Watford og fengið á sig 15 mörk í síðustu fimm leikjum í úrvalsdeildinni.

Við brotthvarf Ole Gunnar tók Michael Carrick tímabundið við knattspyrnustjórn Manchester United en þann 5. desember 2021 var Þjóðverjinn Ralf Rangnick ráðinn knattspyrnustjóri liðsins, í það minnsta til loka yfirstandandi keppnistímabils.

Ralf Rangnick hvarf á braut eftir keppnistímabilið 2021 - 2022 og Erik ten Hag, sem hafði stýrt liði Ajax með góðum árangri, var ráðinn knattspyrnustjóri Manchester United þann 21. apríl 2022.

Talsverðar breytingar urðu á liði Manchester United fyrir keppnistímabilið 2022 - 2023. Margir leikmenn fóru frá liðinu og ber helst að nefna þá Paul Pogba (frjáls för til Juventus), Nemanja Matic (frjáls för til Roma), Jesse Lingard (frjáls för til Nottingham Forest), Juan Mata (samningslaus), Edinson Cavani (samningslaus, fór til Valencia), Andreas Pereira (seldur til Nottingham Forest), Dean Henderson (lánaður til Fulham), Eric Bailly (lánaður til Marseille) og Alex Telles (lánaður til Sevilla).

Þeir leikmenn sem komu til baka til Manchester United, eftir að hafa verið í láni, voru þeir Anthony Martial (var hjá Sevilla), Donny van de Beek (var hjá Everton) og Brandon Williams (var hjá Norwich City). Til liðsins komu einnig þeir Christian Eriksen (samningslaus eftir að hafa verið hjá Brentford), Tyrell Malacia (keyptur frá Feyenoord), Lisandro Martínez (keyptur frá Ajax), Carlos Henrique Casimiro (keyptur frá Real Madrid), Antony Matheus dos Santos (keyptur frá Ajax) og Martin Dubravka (fenginn að láni frá Newcastle United).

Þá er rétt að geta þess að þann 22. nóvember 2022 var samningi Manchester United við Cristiano Ronaldo rift og hann fór, í ársbyrjun 2023, til Al Nassr í Sádi-Arabíu.

Þegar lokað var fyrir félagaskipti leikmanna, að kvöldi 1. september 2023, höfðu nokkrar breytingar orðið á liði Manchester United frá lokum keppnistímabilsins 2022 - 2023. Frá liðinu voru m.a. farnir David De Gea (samningslaus), Anthony Elanga (seldur til Nottingham Forest), Dean Henderson (seldur til Crystal Palace), Frederico Rodrigues de Paula Santos, þekktur sem Fred, (seldur til Fenerbahçe), Phil Jones (samningslaus), Alex Telles (seldur til Al-Nassr), Alex Tuanzebe (samningslaus), Brandon Williams (lánaður til Ipswich Town), Eric Bailly (seldur til Beşiktaş) og Mason Greenwood (lánaður til Getafe).

Til liðsins voru komnir Jonny Evans (samningslaus eftir að hafa verið hjá Leicester City), Rasmus Højlund (keyptur frá Atalanta), Mason Mount (keyptur frá Chelsea), Andre Onana (keyptur frá Inter Milan), Altay Bayindir (keyptur frá Fenerbahçe), Sergio Reguilon (fenginn að láni frá Tottenham Hotspur) og Sofyan Amrabat (fenginn að láni frá Fiorentina).

Frá þessari síðu er hægt að fara á tvær undirsíður. Á annarri síðunni er hægt að fylgjast sérstaklega með úrslitum leikja liðsins og á hinni síðunni er að finna nokkrar myndir.

Hér er hægt að sjá hvernig liðinu vegnaði keppnistímabilin 2002 - 2003, 2003 - 2004, 2004 - 2005, 2005 - 2006, 2006 - 2007, 2007 - 2008, 2008 - 2009, 2009 - 2010, 2010 - 2011, 2011 - 2012, 2012 - 2013, 2013 - 2014, 2014 - 2015, 2015 - 2016, 2016 - 2017, 2017 - 2018, 2018 - 2019, 2019 - 2020, 2020 - 2021, 2021 -2022, 2022 - 2023 og 2023 - 2024.